Гостување на Кристина Краличин во „Ја сакам Македонија“ на Сител телевизија

„Карактеристиките на романот „И“ се цврста фабула, хронолошки ред на случувањата, подолг период на дејствијата во реален простор, со силен израз на психолошко-регенеративна човекова свест, акцентирајќи го човечкиот внатрешен свет на еден висок емотивен набој, чинам можеби прв во Македонија со ваков стил на изразување каде нараторот се изразува на современ и софистициран начин, додека дијалозите во романот се пишувани во реален дијалектен говор што се користел во тој период на тој простор“ - изјави Краличин. 

„На овој начин романот е комплексно стилизиран, а од друга страна лесен за читање и разбирање што секако тоа намерно го претендирав, да биде јасен, отворен, дури да има улога на соговорник со читателот, како да излегува од затворената форма испечатена на хартија и постои како една реалност околу читателот. Доживувањето додека се чита романот, е повеќе од самата реалност. Тоа е влез во еден свет што не ги познава границите на времето. Мислам дека е наменет за целата публика, токму поради овие карактеристики што ги наведов. Пораката во романот „И“ е воедно и симболика на оваа буква - наслов на романот, порака дека минатото не смееме да го потиснеме, да го заборавиме, да го зафрлиме во сеќавањата и да не чувствуваме одговорност кон него.“ 

„И значи дека секогаш треба да има продолжување, да одиме понатаму и да не запираме, затоа што само така ќе можеме да се дефинираме и самите себеси. Само со отворање на затворените страници на животот, со напојување на нашите корени со духовната храна, како дрвото што се храни од коренот за да создаде широка крошна што виши до небото, така и ние секогаш треба да знаеме кои сме и што носиме во себе. Тоа е повеќе би рекла, себепронаоѓање. Во лавиринтот на животот И секогаш ќе биде потсетник кој е патот што води до излезот од тој лавиринт во кој не смееме како народ и како земја да се изгубиме“ - изјави Краличин.

Книгата објавена под едицијата „Пегаз“, во издание на „Арс Ламина“, е достапна во сите поголеми книжарници и онлајн преку www.literatura.mk.

Погледнете го целото гостување на Кристина Краличин: