Кристина Краличин гостуваше во „Наш Подиум“ на 7 март 2025 година кај водителката Јаглика Петковска. Разговорот беше на тема досегашното творештво на авторката, со посебен акцент на промоцијата на романот „И“ во издание на Арс Ламина, меѓутоа и на сите досегашни изданија на собјавените стихозбирки и белетристиката на писателката.
„Ценев дека тоа што романот е влезен во најтесниот избор за наградата Пегаз е мошне значајно за еден ваков роман, и дека тоа ќе го докомплетира моето дело во целина. Многу ми значи оваа награда, поточно тоа што романот се најде во најтесниот избор на Пегаз бидејќи е престижна награда за секој автор. Со голема љубов го отворам моето срце и еве го подарувам на читателите ветувајќи дека И понатаму ќе продолжам да творам И нема да запрам, бидејќи пишувањето е нешто за што сум се предодредила, чинам уште „пред да се родам.“
„Доживувањето додека се чита романот, е повеќе од самата реалност. Тоа е влез во еден свет што не ги познава границите на времето. Мислам дека е наменет за целата публика, токму поради овие карактеристики што ги наведов. Пораката во романот „И“ е воедно и симболика на оваа буква - наслов на романот, порака дека минатото не смееме да го потиснеме, да го заборавиме, да го зафрлиме во сеќавањата и да не чувствуваме одговорност кон него.“
„Романот „И“ е мој четврти роман. Сите мои романи досега се различни не само по содржината туку и по стилот на изразување. Но, чинам дека овој мој последен роман се разликува од другите не само поради тоа што станува збор за ликови и дејствија кои навистина се случиле во минатото на нашето македонско тло во едно македонско село, туку се разликува и според начинот на кој се роди како идеја којашто понатаму се оформи во книжевно дело.“
Промовиран романот „И“ на Краличин кој се најде во најтесниот избор за наградата „Пегаз“ за 2024 година. „И“ е четврти роман на Кристина Краличин, базиран на вистинска приказна со реални настани и случувања, со ликови именувани со вистински имиња. Лична семејна сага со автентични описи на македонските обичаи, традиции, адети, изгледот на македонското село Теово, атарот на селото и областа Азот.
Писателката беше облечена во елегантна бела комбинација со потпис на ЕЛЕНА ЛУКА. Уникатниот костум е спој на модерна естетика и безвременска елеганција, со асиметричен украс на едното рамо што му дава дополнителна нота на автентичност.
Гостување на Кристина Краличин, новинар Бисера Ловачева - Промоција на романите „Денот пред да се стемни“ и „Последна шанса за втора клапа“ - 23 февруари 2024
Гостување на Кристина Краличин, водител Јована Костадиновска - Прва награда во Италија на меѓународен литературен конкурс и промоција на два нови романи „Денот пред да се стемни“ и „Последна шанса за втора клапа: сценариото на немиот сведок“.
Се работи за едиција од 14 романи кои меѓусебно се поврзани на еден специфичен и невообичаен начин. Нишката што ги поврзува тие романи лежи во самата содржина на романите, иако темите што се разработуваат се различни.
Во просториите на Café Литература во Дајмонт мол на 15 февруари 2024 година со почеток од 19 часот се одржа промоција на двата нови романи „Денот пред да се стемни“ и „Последна шанса за втора клапа: сценариото на немиот сведок“ од авторката Кристина Краличин пред стотина гости кои присуствуваа на овој настан.
Еден роман се пишува користејќи го насобраниот депозит во својата душа низ животот. Не се пишува веднаш, не се пишува преку ноќ, тој е дел од сѐ тоа што значи комплетност на една личност, како што се: образованието, културата, искуствата, афинитетите и, секако, природниот талент што се поседува – вели авторката